Straeon Tic Toc

Mae agor clawr y llyfr lliwgar hwn a theithio o dudalen i dudalen fel gwibdaith trwy gartŵn ac yn berffaith i ddeffro dychymyg plant ifanc cyn iddynt fynd i gysgu. Mae llu o awduron poblogaidd wedi cyfrannu at y casgliad. Mae Anni Llŷn yn mynd â ni i fyd yr Wmffifflwffs, Caryl Parry Jones yn gwneud i ni ddotio unwaith eto ar Cyw a'i ffrindiau, Casia Wiliam yn cyflwyno Ben Dant, a gwych yw cael nifer o’r cymeriadau poblogaidd hyn ar silff ystafell wely plentyn bach yn ogystal ag ar y sgrin deledu.



Pwy a wyddai fod poteli salad crîm yn gallu siarad? Bod yr Wmffifflwffs wrth eu boddau gyda chân fach? Bod coblynnod cas yn gallu gwneud i liwiau ddiflannu? Mae’r gyfrol annwyl hon yn llawn dop a rhyfeddodau, cyfrinachau, creaduriaid o bob lliw a llun, heb son am y darluniau di-ri. Mae pob cymeriad yn hynod o hoffus ac yn siŵr o godi gwên ar wynebau bechgyn a merched bach Cymru, boed hynny yn ystod amser stori yn yr ysgol neu cyn mynd i’r gwely.



Neidiwch i ganol y byd hwn o hud a hapususrwydd. Hwrê, mae’n amser stori! ~Llinos Griffin @ www.gwales.com