Cariad Pur?

Cariad. Mae’n gadael ei flas a’i farc ar bob yr un ohonon ni. Mae’n croesi cenedlaethau, cyfandiroedd ac ystrydebau – yn union fel y gwna'r gyfrol hon. Rydyn ni ar drothwy Dydd Santes Dwynwen ac mae’r gyfrol hon yn gwtsh cynnes i’w gael ar y soffa, ond ni chewch yr hyn a ddisgwyliwch.



O’r cychwyn cyntaf, mae'r darllenydd yn sylweddoli nad sothach sopi sydd yma. Mewn stori am ddial mewn pentref glan-môr, sydd yn gadael blas go hallt ar eich gwefusau, mae mwy i hon na rhamant. Ceir fflyd o straeon gan naw awdur gwahanol ac maent yn cyffwrdd â chariadon ifanc a hen, a'r pellter poenus sydd rhyngddynt ar brydiau, ynghyd â chariad tragwyddol, tor cariad a’r cariad hwnnw sy’n dinistrio ffiniau.



Mae’r gyfrol yn gymysgedd o gyfnodau mewn hanes. Mae’r darllenydd yn plymio i ddegawdau ac i amseroedd tra gwahanol ymhob stori, gan gynnwys elfen o gariad mewn modd cynnil ac amlwg yr un pryd. Yn 'Y Dderbynwraig', trwy gymeriad cymhleth y Parchedig Emyr Jackson, mae Guto Dafydd yn cyferbynnu cyfrifoldeb caeth a cheidwadol y capel â chwant cnawdol sy’n gallu ymylu ar ffieidd-dra, ac yna daw cariad diffuant – yn annisgwyl – i’r amlwg i orchfygu’r cwbl. Mae sawl haen i’r stori hon ac yn wir i'w phrif gymeriad, Emyr.



Aiff Bethan Gwanas â ni i Gartref Henoed Bryn Dedwydd yn 'Elen, tyrd yn ôl', lle mae rhywbeth yn hyfryd, hiraethus ac yn hynod o drist a hapus wrth ddarllen am Elwyn, o’i gadair freichiau, yn gweld Elen am y tro cyntaf ers amser maith. Wrth i’w stumog chwyrlïo a’i galon lamu’n afreolus unwaith eto, ai dryswch meddwl hen ŵr sydd yma? Mae calon y darllenydd yn llamu o dosturi ac eto’n meddalu o glywed yr union beth mae Elwyn yn ei weld, ei deimlo ac yn gobeithio amdano unwaith eto, sef cariad pur.



Mae’r gyfrol hon yn llwyr haeddiannol o gael ei dewis yn Llyfr y Mis gan gwmni Waterstones, un o lyfrwerthwyr mwyaf Prydain, a'r llyfr cyntaf erioed yn yr iaith Gymraeg i ennill y teitl. Do, mae’r awduron hyn wedi codi eu saethau Ciwpid, wedi'u hanelu at diroedd diderfyn cariad ac wedi chwalu sawl ffin. ~Llinos Griffin @ www.gwales.com