Heliwr, Yr - Si Sô Jac y Do

An exciting novel offering up another challenge to detective Noel Bain. ~Publisher: Y Lolfa

Mae'r nofel dditectif wastad wedi ennyn diddordeb pobl o bob oed, ac mae’r nifer hynny sydd yn gwylio’r rhaglen Crimewatch yn dangos yn glir y diddordeb mawr sydd gan y cyhoedd mewn troseddau difrifol, yn enwedig llofruddiaethau.



Mae Lyn Ebenezer yn awdur profiadol ym myd troseddau difrifol, ac wrth ddarllen y gyfrol hon mae Lyn yn fy rhyfeddu – nid yn unig oherwydd ei ddychymyg byw ond hefyd oherwydd ei wybodaeth drylwyr o ddulliau'r heddlu o weithredu, a hyd yn oed waith patholegydd mewn archwiliad postmortem.



Nofel dditectif yw Si Sô Jac y Do gyda'r troseddau yn cael eu lleoli yn Aberystwyth. Mae’r awdur yn adlewyrchu bywyd cyfoes trefi Cymru lle mae defnyddio cyffuriau anghyfreithlon wedi dod yn rhan o fywyd bob dydd. Fe’n harweinir ni at fywyd ‘drygis’ y dref a chawn gipolwg ar y problemau sy’n wynebu’r heddlu wrth iddynt ymchwilio i ddwy lofruddiaeth.



Cawn ddarlun clir o'r gŵr ifanc yn ei ‘grys denim a’i jîns tyllog’, heb geiniog yn ei boced. Mae hi'n hwyr yn y nos ac yntau’n gwbl ddibynnol ar y cyffur heroin. Pwy yw’r ‘samaritan’ a roddodd chwistrell o gyffur yn rhad ac am ddim iddo, cyffur sydd yn cael ei werthu am bris uchel ar y stryd? Dyma ddirgelwch cyntaf y nofel.



Y tu ôl i’r rhai sy’n ddibynnol ar heroin mae barwniaid mawr byd y cyffuriau, y rhai sy’n cyflogi eraill i wneud y gwaith brwnt o werthu’r cyffuriau mewn clybiau nos, ac mae’r awdur wedi llwyddo i gyflwyno’r cymeriadau yn fyw iawn yn y gyfrol. Weithiau, mae yna berygl drysu pan fo enwau cymeriadau yn rhy debyg i’w gilydd, er enghraifft, Prosser a Porter.



Mae rhwyd yr heddlu'n tynhau ac mae’r barwn yn erlid un o’i weision o’r dref, a gwelir mor beryglus oedd gwaith y ‘gwas’ gan iddo gael ei hanner ei ladd ar y trên wrth geisio dianc.



Mae’r digwyddiadau wedi eu gweu i’w gilydd yn gelfydd ac mae’r nofel yn eich dal hyd y diwedd pan ddaw goleuni ar yr holl ddirgelwch. Nofel gwerth ei darllen yw hon ac un, rwy’n siŵr, fydd o ddiddordeb i lawer.



Y feirniadaeth orau y gall un ei rhoi ar unrhyw gyfrol yw ei fod yn ‘methu â’i rhoi i lawr’. Dyna’r union beth ddigwyddodd i mi wrth ddarllen y gyfrol hon. ~Roy Davies @ www.gwales.com