Cyfres Whap!: Adref Heb Elin

Mae tua 25,000 o bobl yn diflannu bob blwyddyn. Un o’r bobl hynny yw Elin, merch ddwy ar bymtheg o Borthmadog. Cawn weld yn y nofel afaelgar hon effaith ei diflaniad dirybudd annisgwyl ar ei rhieni a’i chwaer, Ceri Mai.



Adroddir y stori fel catharsis o fath gan y chwaer ac mae daeargryn y diflaniad yn peri poen a gwewyr meddwl di-baid i’r tri sydd ar ôl. Tafla’r digwyddiad ei gysgod ar nifer o drigolion Port a chydnabod y teulu. Ond yr agosaf sy'n cael eu niweidio. Wrth i’r awdur dynnu darlun o ddedwyddwch teuluol yn cael ei rwygo, mae’r brifo’n boenus. Fe’n tynnir drwy’r holi a’r amheuon, y dadansoddi a’r gwadu, y cyhuddo a’r ymdrechion poenus i freuddwydio a cheisio cadw fflam gobaith yn fyw. Catharsis yw’r nofel wrth i Ceri sylweddoli cyn lleied yr adwaenai ei chwaer ddiflanedig. Yn grefftus llwydda Gareth F. Williams i adrodd stori llawn ing a gwewyr meddwl, gyda’r gwrthdaro mewnol yn tynnu’r darllenydd ar lwybr y chwilio a’r chwalu.



Rhennir y nofel yn dair rhan, ac mae tinc rhyw wirionedd syml yr ysgrifennu yn peri i’r stori garlamu ymlaen. Daw’r ddeialog rhwng y tri o’r cymeriadau’n fyw. Mae’r ysgrifennu’n ddirodres gydag ambell ddisgrifiad a chymhariaeth yn pefrio.



Gadewir y darllenydd ar ddiwedd y nofel hon yn fyr ei anadl yn gobeithio, yn dyheu ac yn gweddïo na ddigwyddith dim byd o’r fath iddo yntau. Ie, clatsien o nofel sy’n ddifyrrwch difrifol. ~Ion Thomas @ www.gwales.com