Dyddiadur Dripsyn: Syniad Dwl Dad

Cafodd Greg Heffley, sef y Dripsyn honedig, ddyddiadur yn anrheg gan ei dad, ac ynddo mae’n cofnodi ei helyntion drygionus a’i droeon trwstan. Mae cynhwysion stori’r ‘bachgen drwg’ – yn yr un traddodiad a Nedw (E. Tegla Davies) a Just William (Richmal Crompton) – yma i gyd, sy’n sicr o fod yn boblogaidd gyda phlant, yn enwedig bechgyn. Mae yma luniau du a gwyn hyfryd gan Jeff Kinney ar bob tudalen. Mae’r iaith yn dafodiaeth ogleddol, efallai yn rhy ogleddol ar adegau – roedd yna rai geiriau dieithr iawn i blant o dde Cymru (e.e. drybola, hysio, tantro, swadan, honco, hartan) a allai, efallai ymestyn eu geirfa, neu eu drysu! Mae’r testun yn llawn hiwmor, a’r lluniau yn ategu hynny. Mae yma gymeriadau byw a chofiadawy - Greg ei hun, ei dad a’i frodyr Roderic a Mani.



Mae’r fformat dyddiadur yn fodd i annog plant i ddechrau eu dyddiadur eu hunain. Er bod yr awdur o America mae’r addasiad hwn yn hynod Gymreig. Mae pob diwrnod fel pennod fach wahanol, gydag elfennau fydd yn apelio at blant 11–13 oed, fel y gariadferch Heulwen Hills sy’n anwybyddu Greg, y brawd Roderic sy’n ei gasáu, y brawd bach sy’n cael ei ddifetha’n rhacs, a’i gyfaill ffyddlon Roli. Mi fydd plant yn sicr o gael y llyfr hwn yn ddifyr, ac mae’n fodd i annog y rhai llai academaidd i ddarllen ac i ysgrifennu. ~Eiry Palfrey @ www.gwales.com