Tomos Llygoden y Theatr a'r Nadolig Gorau Erioed

Antur Nadoligaidd go iawn yw sail y gyfrol fach wreiddiol hyfryd hon yng nghyfres fach dwt a lliwgar Tomos y Llygoden Theatr, ar gyfer plant rhwng 4 ac 8 oed. Dyma Caryl Parry Jones a Craig Russell ar eu gorau wrth gyflwyno stori annwyl dros ben sy’n llawn hud a lledrith y Nadolig. A chydag arlunwaith wreiddiol Leri Tecwyn yn gefndir i’r cyfan, dyma gyfrol fydd yn gwneud i’r gynulleidfa gyfan deimlo’n gynnes braf o’i darllen.



Mae’n Noswyl Nadolig, a holl gynnwrf y theatr yn dirwyn i ben dros yr ŵyl. Mae pawb yn llawn cyffro, wrth gwrs, ac yn edrych ymlaen yn fawr at gael mwynhau’r dathliadau gyda’u teuluoedd a’u ffrindiau – pawb heblaw Mr Noel, y gofalwr. Fel yr eglura mewn sgwrs â Tomos, adref ar ei ben ei hun, heb deulu, ffrindiau nag anrhegion fydd Mr Noel ar ddiwrnod y Nadolig, ac mae’r syniad hwnnw’n gwneud i Tomos deimlo’n ddigalon.



Dyna pryd y caiff syniad, ac wrth neidio i boced Mr Noel ar ei ffordd adref o’r theatr y noson honno, prin y gallai Tomos fod wedi dychmygu ei fod ar fin dechrau ar antur fwyaf ei fywyd. Ac am gyffrous! Ond wna i ddim datgelu mwy, rhag difetha’ch hwyl chi!



Y cyfan sydd eisiau i chi wybod fod hon yn stori lawn cyffro, dirgelwch, hiwmor a thynerwch, sydd hefyd yn cynnwys neges fach gynnil a phwrpasol ar y diwedd hefyd, a gair bach gan yr awduron ar y dechrau. Dyma stori ddelfrydol i’w darllen yn ystod y cyfnod yn arwain at y Nadolig, gan wneud i ni i gyd gredu erbyn y diwedd nad oes neb tebyg i Siôn Corn yn y byd i gyd!



Ac os na allwch chi aros tan y Nadolig i ddarllen y stori fach annwyl hon, wel mae digon o anturiaethau eraill yng nghyfres Tomos Llygoden y Theatr i’w darllen yn y cyfamser, felly ewch amdani! ~Sioned Lleinau @ www.gwales.com