Tomos Llygoden y Theatr a Feiolet Pot Blodau

Cyfrol fach hwyliog arall yng nghyfres ein ffrind bach annwyl, Tomos Llygoden y Theatr gan Caryl Parry Jones a Craig Russel, gyda lluniau unwaith eto gan Leri Tecwyn. Ond er ei bod yn fach o ran maint, mae yna ddigon i ddifyrru’r gynulleidfa ifanc, gyda dawn dweud yr awduron a’r lluniau bywiog yn denu sylw’r darllenydd o’r dechrau i’r diwedd.



Yn y gyfrol hon, cawn ein cyflwyno i un o gymeriadau lliwgar eraill y theatr sy’n gartref i Tomos a’i ffrindiau, sef Feiolet Pot Blodau, un o’r tair sy’n gyfrifol am lanhau’r theatr yn eu tro. O’r cychwyn cyntaf, caiff Feiolet, hoff lanhawraig y llygod i gyd, ei phortreadu fel cymeriad lliwgar a doniol, ond y lanhawraig fwyaf anobeithiol erioed, wrth iddi adael annibendod a baw ar ei hôl ym mhob man. Wrth gwrs, o safbwynt y llygod, mae yna fanteision i’w hesgeulustod, oherwydd mae hi’n llwyddo i adael digon o fwyd – o felysion i greision – ar ei hôl i Tomos a’i ffrindiau eu mwynhau!



Ond, o glywed bod swydd Feiolet o dan fygythiad oherwydd yr holl lanast y mae’n ei adael o gwmpas y theatr, penderfyna Tomos a’r criw fod yn rhaid iddynt wneud rhywbeth i’w helpu. Buan iawn y maen nhw’n sylweddoli mai prif broblem Feiolet yw ei llygaid; dyw hi ddim yn gweld yn iawn. Maen nhw’n bwrw ati ar frys mawr, felly, i drio datrys y broblem honno drwy dwrio drwy’r hen ddrôr sy’n llawn o drugareddau sydd wedi eu hanghofio yn y theatr gan aelodau o’r gynulleidfa, yn cynnwys parau o hen sbectol. Ac o hynny ymlaen, caiff bywyd Feiolet Pot Blodau ei weddnewid yn llwyr.



Ond beth felly sy’n digwydd i’w swydd hi? Ydy Tomos ‘y llygoden fach hapus, brwdfrydig, chwilfrydig, hynod o ciwt ac anturus’ a’i ffrindiau’n llwyddo i achub y dydd? Wel, bydd yn rhaid i chi brynu’r gyfrol a darllen y stori i gyd i ddarganfod hynny! Y cyfan ddyweda i yw ei bod hi’n syndod beth allwch chi gyflawni gyda thipyn bach o help creadigol gan griw o ffrindiau da. Does dim byd yn amhosib! ~Sioned Lleinau @ www.gwales.com