Dan Gwmwl Du

Os ydych chi’n gyfarwydd â hanes y Ditectif Jeff Evans, dyma ddilyniant naturiol i’r nofel ddiwetha. Ond os nad yw’r straeon blaenorol yn gyfarwydd i chi, gallwch blymio i dudalennau'r nofel hon yr un mor hawdd, heb wybod y cefndir. Yma mae’r ditectif yn holi, procio, cythruddo ac ymchwilio yr un mor drwyadl ag erioed er mwyn dod at y gwirionedd, a hynny wrth iddo geisio achub ei enw da a’i yrfa yn yr heddlu. Lleolir y rhan fwyaf o'r nofel hon ar stad wledig yng nghefn gwlad gogledd Cymru. Ond mae awgrym yma fod yna ochr dywyll i’r gymuned hon wrth i Jeff Evans ymchwilio i ymosodiad ar berchennog y stad, ac i sawl digwyddiad anghyfreithlon arall sydd ynghlwm â’r lle.



Wrth grafu'r wyneb mae’n darganfod sawl haenen bwdwr a allai fod yn dylanwadu ar y drygioni sydd ar waith yn y gymuned. Yn gymysg â’r cyfan ceir awgrym bod rhai o ddynion dieflig y pentre – y rhai sy'n byw yno ar hyn o bryd ac ambell un o’r gorffennol – yn gyfrifol am rwydwaith smyglo pobl, a hynny ar raddfa ryngwladol.



Ar sawl achlysur daw’r awdur â delweddau o arferion bywyd cefn gwlad o'r gorffennol yn fyw drwy’r tudalennau. Ac er bod nifer y cymeriadau sy’n cael eu cyflwyno yn achosi rhywfaint o ddryswch ar brydiau, mae’r troeon annisgwyl yn y stori yn eich ysgogi i ddal ati. Mae iddi ddiweddglo cyffrous wrth i’r ditectif herio trais a cheisio achub bywydau trigolion y stad. Dyma nofel sy’n hawdd ei darllen, gyda llinyn storïol cryf drwyddi, a chymeriadu credadwy. ~Sara Gibson @ www.gwales.com