Cyfres Pen Dafad: Haciwr

Mae rhywun yn hacio i mewn i gyfrifiaduron y brifysgol ac yn rhoi adeilad yr Adran Ffiseg ar dan er mwyn cael gwared ar wybodaeth bwysig. Nofel lawn antur, wedi'i hysgrifennu mewn penodau byr. ~Publisher: Y Lolfa

Does dim yn well na nofel sy'n trafod pynciau modern i ddenu plant a phobl ifainc i ddarllen, a dyna yn union yw'r nofel hon. Yma ceir stori gwbl gyfoes am fyd hacio cyfrifiaduron. Dydyn ni, efallai, ddim yn meddwl bod y fath beth yn digwydd yng Nghymru, ond mae'r nofel yma wedi'i lleoli ym Mhrifysgol Aberystwyth ac wedi'i hysgrifennu gan ddarlithydd sy'n gweithio yn y brifysgol.



Dyma stori sy'n dod â nifer fawr o elfennau ynghyd ar y diwedd, a hynny mewn ffordd gelfydd. Mae'r gwaith ymchwil a wneir gan un doethur yn yr Adran Ffiseg yn gwbl wreiddiol ac, o bosib, ar fin torri tir newydd, ond un noson rhoddir yr Adran Ffiseg ar dân – gan bwy, tybed? Nid dyna ddiwedd y stori – mae gwaith ymchwil hynod o bwysig ar goll a haciwr ifanc iawn a'i ffrind sy'n dod at wraidd y dirgelwch. Mae'n stori sy'n gorffen yn ddigon hapus ond mae 'na ddrama fawr rhwng y cloriau wrth i ni gael golwg ar fyd yr haciwr ac ar bwysigrwydd patents yn y byd gwyddonol.



Hyd yn oed os nad ydych yn ymddiddori yn y byd cyfrifiadurol, bydd elfennau o'r stori gyffrous hon at eich dant. A hithau'n nofel yn y gyfres Pen Dafad, ar gyfer ieuenctid y'i hysgrifennwyd ac rwy'n siŵr y bydd disgyblion hŷn ein hysgolion a myfyrwyr fel ei gilydd yn cael pleser mawr o'i darllen. Gydag ychydig o benodau eraill rwy'n siŵr y gallai'r nofel wneud ffilm dda ryw ddydd. Beth amdani, Hywel Griffiths? ~Sarah Down-Roberts @ www.gwales.com