Cyfres fy Amser Stori Cyntaf: 3. Dyn Bach Sinsir, Y

Dyma gyfrol fach clawr caled atyniadol newydd yn y gyfres Fy Amser Stori Cyntaf, gyda stori gyfarwydd iawn, sef y dyn bach sinsir drwg hwnnw sy’n dianc a neb yn gallu ei ddal nes i’r llwynog cyfrwys ei hebrwng ar draws yr afon ac yna ei lyncu a’i fwyta. Cyfrinach apêl y straeon syml hyn yw'r ffaith bod modd eu cyflwyno i blant bach dros y cenedlaethau, a'u bod yn ddifyr ac yn newydd i bob cenhedlaeth. Gellir olrhain stori’r dyn bach sinsir yn ôl i 1875, ac mae’n ddoniol iawn wrth i'r rhestr o bobl sy’n rhedeg ar ôl y dyn bach yn mynd yn hwy o dudalen i dudalen. Ceir rhythm apelgar a chofiadwy i’r ailadrodd cyson: “Rhedwch a rhedwch fel y gwynt ar antur, ond wnewch chi byth ddal y dyn bach sinsir!”



Addaswyd y fersiwn yn arbennig o dda gan Non Tudur gyda geirfa goeth ond hawdd i’w dilyn, ac mae’r lluniau lliwgar gan Sophie Rohrbach yn llawn bywyd a hwyl. Dyma gyfrol i’w darllen i blant bychan cyn mynd i gysgu neu i’w mwynhau ar lafar mewn ysgol feithrin neu i blant ieuengaf yr ysgol gynradd. Mae yma hefyd rysáit ar gyfer coginio dyn sinsir, a phos darganfod y gwahaniaeth rhwng dau lun ar y clo. Mae’n werth nodi mai cyfrol uniaith Gymraeg yw hon. ~Gwenan Mared @ www.gwales.com