Stori Sydyn: Elyrch - Dathlu'r 100

Teitl yn y gyfres o gyfrolau byr a chyflym Stori Sydyn. Cyfrol sy'n adrodd hanes rhyfeddol clwb pel-droed Abertawe, a'i daith anhygoel i'r Uwch Gynghrair. Mae'r llyfr yn canolbwyntio'n bennaf ar dymor llwyddiannus 2010-11. Mae'r awdur wedi bod yn gefnogwr triw i'r clwb dros y blynyddoedd. ~Publisher: Y Lolfa

Mae dathlu canmlwyddiant yn ennyn ar lawenydd. Bydd y gorfoledd yn fwy os bydd Abertawe yn dal yn Uwchgynghrair Lloegr pan ddaw’r achlysur hwnnw yn ystod haf eleni. Croeso cynnes, felly, i’r llyfr hwn yn y gyfres Stori Sydyn ar drothwy’r garreg filltir yn hanes y clwb pêl-droed a ymgartrefodd erbyn hyn yn Stadiwm y Liberty.



Dyma lyfr ddylai hawlio sylw dilynwyr y bêl gron ar hyd a lled y wlad oherwydd cofnodir y gwych a’r gwachul yn hynod o ddifyr. Mae’r bennod sy’n sôn am oes aur Toshack yn sicr o ddenu chwilfrydedd darllenwyr o bob oed. Bydd y manylion am Ivor Allchurch a’i gyfoedion yn llonni calonnau y rhai a gafodd y fraint o weld yr arwyr yn arddangos eu doniau.

Mae breuddwydion yn ran annatod o fywyd cefnogwyr pêl-droed. Cofnodir nifer a wireddwyd yn y llyfr ond hefyd, yn bwysicach, rhoddir sylw i’r hunllefau ar y maes a thu hwnt. Dysgwyd rhai gwersi ond bu esgeulustod ariannol yn bwnc cyson i ddilynwyr nifer o glybiau. Llwyddodd y llyfr i ddarlunio rhai cymeriadau diddorol o’r newydd. Diolch hefyd am y cyfle i ddwyn i gof chwaraewyr fel Herbie Williams a oedd yn llechu yn niwloedd pell plentyndod.



Mae rheolwyr clybiau pêl-droed yn griw amrywiol a lliwgar ar adegau. Gwenu a gwgu fydd tynged y darllenydd wrth feddwl am rai a gafodd y barchus arswydus swydd ar y Vetch ac yn ddiweddarach ar y Liberty. Bathwyd nifer o enwau er mwyn disgrifio'r gŵr sydd wrth y llyw gan glybiau bach a mawr. Gall fod yn brif hyfforddwr neu’n gyfarwyddwr pêl-droed ond waeth beth fo'r enw ennill yw’r disgwyliad mawr.

Cofnodir hynt a helynt yr Elyrch yn ystod misoedd cynnar y tymor cyntaf yn yr Uwchgynghrair. Gobeithio y daw cyfle i ddarllen atodiad yn manylu ar y tymor hanesyddol maes o law. ~Trefor Jones @ www.gwales.com