Trysorfa Arwyr Cymru

Mae’r gyfrol hon yn drysor i’r eithaf ac yn gyfoeth o hanesion arwyr Cymru. Heb os nac oni bai, mae hon yn gyfrol i’w rhoi ar silff bob Cymro neu Gymraes ifanc. Mae’r casgliad o straeon wedi eu hysgrifennu gan Tudur Dylan Jones ac wedi eu darlunio gan Brett Breckon, ac mae'r gyfrol yn gronicl hardd o fywydau rhai o ddewrion mwyaf y genedl.



Nid dim ond hanes a ffeithiau a geir yma, ond rhoddir ongl newydd i nifer o’r straeon. Cawn glywed hanes nawddsant Cymru a'r cymeriadau eraill o’u genau nhw eu hunain. Mae hyn yn rhoi osgo ffres a newydd i hen hanes ac i’r deg cymeriad sydd wedi eu cynnwys yma. Ond mae'r awdur yn mynd yn bellach na hynny. Cawn glywed hanes y Dywysoges Nest ar ffurf penillion – dyna braf yw crynhoi ei stori hi trwy gyfrwng barddoniaeth.



Yr hanesion hynod, y cymeriadau o gig a gwaed a'r lleoliadau llwm a llewyrchus o un pen i’r wlad i’r llall sydd yn gwneud y llyfr hwn yn un arbennig, ond rhaid hefyd edrych ar lithrigrwydd yr iaith drwyddi draw - nid yw'n henffasiwn, ac mae’n sicr yn diddanu plentyn.



Dyma wers hanes ar ei newydd wedd. Mae’r llyfr yn fwrlwm o helyntion a chymeriadau i’w dathlu ac yn rhai a newidiodd Cymru am byth. ~Llinos Griffin @ www.gwales.com