Stori Sydyn: Tacsi i Hunllef

Mae Ffion, y gyrrwr tacsi, a Josh ei mab yn gymeriadau pwysig yn y nofel gyffrous hon. Mae Josh mewn cariad efo Mari sy'n byw yn Heol y Garn, ardal lawer mwy cefnog. ~Publisher: Y Lolfa

Mae rhywun yn llofruddio trigolion stad Rhyd-y-felin, gan dargedu dynion penodol a’u lladd mewn ffordd erchyll. Pwy a pham yw’r cwestiynau mae’n rhaid i DC Arthur Jones a’i gyd-weithwyr yn swyddfa’r heddlu eu hateb, a hynny ar frys. Bwriad cyfres Stori Sydyn yw hybu darllen trwy gyfrwng cyfrolau byrion. Dyma’r gyfrol gyntaf i mi ei darllen, ac wrth edrych ar froliant y llyfr, mi wnes i amau a fyddwn i’n ei fwynhau. Sut yn y byd oedd hi’n bosib ysgrifennu’n ddifyr am yr holl gymeriadau a datrys y llofruddiaethau mewn 126 o dudalennau byrion? Roeddwn i’n disgwyl stori arwynebol a chymeriadau un dimensiwn.



Ond cefais fy synnu ar yr ochr orau. Mae’r stori yn cynnal ein diddordeb o'r gair cyntaf hyd at yr un olaf. Er bod y naratif yn symud yn gyflym, yn enwedig ar y dechrau, dim ond tua’r diwedd rydyn ni’n cael gwybod pwy yw’r llofrudd. Mae byd Rhyd-y-felin yn cael ei ddarlunio'n effeithiol fel un llawn bygythiadau ac anobaith, lle mae'ch ffrindiau honedig yn mwynhau eich cwmni, ond hefyd yn eich bygwth â chyllell. Yr un yw eich ffrindiau a'ch gelynion.



Mae Gareth F. Williams yn llwyddo mewn ychydig eiriau i greu cymeriadau byw iawn. Mae Arthur Jones yn poeni am ddyfodol ei fab wrth ysmygu ar y slei y tu cefn i’r swyddfa heddlu. Mae Kelly, cymeriad mwyaf creulon y llyfr, yn ymddangos yn fwy dynol wrth i ni gael ein cyflwyno i’w thad meddw a chlywed i’w mam ei gadael yn ddirybudd pan oedd hi'n blentyn. Ond mae’r cydymdeimlad yn diflannu wrth i Kelly daeru y bydd hi’n dial ar ei mam un diwrnod. Does dim byd yn syml ym mywydau cymeriadau’r llyfr yma.



Mae’r heddlu yn dal y llofrudd mewn diweddglo dramatig, ond daw'r stori i'w therfyn gydag epilog brawychus wrth i Kelly barhau â'i chynllwynio. Mae hi am ddial ar ddau berson penodol, a chawn awgrym nad yw’r stori hon ar ben; tybed a yw'r awdur eisoes yn meddwl am ddilyniant? ~Cerian Arianrhod @ www.gwales.com