Cyfres yr Onnen: Aderyn Brau

Mae Aderyn Brau yn dilyn hanes Megan wrth iddi orfod symud o gefn gwlad i ddinas Abertawe, a'r problemau sy'n codi yn sgil hynny - newid ysgol, rhieni'n gwahanu, ardal anghyfarwydd. Ond yn raddol mae'n sylweddoli nad yw pethau'n wael i gyd wrth iddi baratoi ar gyfer eisteddfod yr ysgol, creu perthnasau newydd a datgelu cyfrinach mae ei mam wedi cadw oddi wrthi. ~Publisher: Y Lolfa

Un o nofelau yng Nghyfres yr Onnen sydd wedi'u hanelu at ddarllenwyr da 913 oed yw Aderyn Brau ac roedd hi’n fraint ac yn fwynhad pur i ddarllen nofel gyntaf yr awdures ifanc hon o Aberystwyth. Mae’n nofel afaelgar sydd wedi’i saernio’n gelfydd. Mae’r iaith yn goeth ac, yn bwysicach fyth, mae iddi stori dda, fyrlymus sy’n siŵr o afael yn nychymyg darllenwyr ifainc.



Dros nos, caiff byd bach delfrydol Megan yng nghefn gwlad Ceredigion ei droi ben i waered wrth i’r ferch fach naw mlwydd oed orfod dygymod â thor-priodas ei rhieni. Yn sgil ymadawiad annisgwyl ei thad, gorfodir Megan a’i mam i symud at ei mamgu yn Abertawe i fyw ac mae gorfod ymdopi â’r bywyd dinesig, newydd hwn yn dipyn o newid byd. Cafodd ei bywyd ei ysgwyd i’w wraidd yn sgil ymadawiad dirybudd ei thad.



Merch fach ddryslyd ac unig yw Megan. Nid oes ganddi agosatrwydd ysgol fach Llanfair na’i ffrind bore oes, Leri, a gwahanol iawn yw diddordebau disgyblion Ysgol Gynradd Gymraeg Maes Tawe.



Mae’n hunllef lwyr iddi ond daw achubiaeth yn sgil yr un nod fawr sydd ganddi, sef ennill y Gadair yn eisteddfod ei hysgol newydd. Caiff lonydd i ysgrifennu ei stori yn sied Arthur Morris, drws nesaf, ac yno yn yr ardd, daw’r ddau ar draws aderyn brau sydd wedi’i glwyfo. O gael gofal ac ymgeledd, caiff yr aderyn bach hedfan yn rhydd a wynebu bywyd unwaith eto, a dyma’n union yr hyn sy’n digwydd i’n prif gymeriad hoffus ni erbyn diwedd y nofel. ~Menna Evans @ www.gwales.com