Gwawr Wedi Hirnos

Dilyniant yw’r gyfrol hon i Na ad fi’n Angof: Byw â Dementia, a gyhoeddwyd gan yr un awdur yn 2020. Yn Na ad fi’n Angof gwahoddwyd nifer o bobl i rannu eu profiadau o ofalu am rai â dementia, gyda'r bwriad o greu dealltwriaeth well o’r clefyd creulon hwnnw a chwalu'r stigma sydd mor aml ynghlwm wrtho. Mewn geiriau eraill, gofynnwyd i bobl rannu eu profiadau personol yn y gobaith y byddai hynny o gymorth i eraill.



Nod tebyg sydd i'r gyfrol bresennol. Ei man cychwyn oedd sylwi ar ymateb amrywiol pobl ym milltir sgwâr yr awdur i argyfyngau bywyd. Yn sgil hynny penderfynwyd gofyn i drawstoriad o bobl, o ran oed a chefndir, lleoliad a rhyw – gan gynnwys rhai o sêr mwyaf adnabyddus

Cymru – i rannu eu profiad o wynebu ar gyfyngau dwys, ac yn eu plith rhywioldeb, colli plentyn, trais, alcoholiaeth, damwain car angheuol, anabledd, galar, a thor priodas.



Perswadiwyd 35 o bobl i gyfrannu i’r llyfr. Mae rhai yn olrhain eu hymateb i’w hargyfyngau mawr personol, gan rannu sut y canfuant lygedyn o obaith ynghanol y cyfyngderau hynny. Mae eraill yn amlinellu ffyrdd o

geisio cynnal y rheini sy’n mynd trwy gyfnodau tywyll a gweinidogaethu iddynt. Trwy’r cwbl, hyderir y bydd y gyfrol hon yn gymorth i’r sawl sy’n wynebu argyfyngau amrywiol bywyd.



Un o’r ysgogiadau pennaf i’r awdur fynd ati i baratoi’r gyfrol oedd ei bod hi ei hun wedi mynd trwy’r argyfwng personol dirdynnol o golli ei thad, ac yntau wedi ei ladd ei hun tra’n dioddef o salwch meddwl. A’i gobaith, wrth iddi rannu’r profiadau personol hynny, yw y bydd yn

gymorth i chwalu rhywfaint ar y stigma a’r tabfi sydd mor gryf ynghylch trafod salwch meddwl a hunanladdiad.



Dyhead yr awdur yw y bydd y gyfrol hon yn ennyn myfyrdod a thrafodaeth – yn y cartref a’r dafarn, y seiat a’r ysgol Sul, y clwb darllen a’r ysgol uwchradd. ~Cyhoeddwr: Prydwen Elfed-Owens