Haf o Hyd?

Wrth ddechrau darllen, wnes i ddim talu digon o sylw i’r marc cwestiwn ar ddiwedd teitl y gyfrol hon. Oherwydd, er bod yr haf yn gefndir i bob stori, nid cyfres o straeon ysgafn, llawn haul, gwyliau a hwyl sydd yma. Yn hytrach, mae yma gyfres o straeon difyr a heriol ar amryw o bynciau, o fam-gu sydd wedi cael llond bol ar fyw ei bywyd yn ôl disgwyliadau ei theulu, i gyfeillgarwch cymhleth tair rhedwraig, a phob un â'i chyfrinach; o ddieithryn sy’n gosod posau geiriol, i gystadleuaeth goginio sy’n esgor ar ganlyniad annisgwyl i ddau o’r cystadleuwyr.



Yn gyffredin i bob stori ceir elfen o anfodlonrwydd; rhywbeth anghyfforddus, anniddig. Dyma’r marc cwestiwn yn y teitl, a dyna sy’n odidog am y gyfrol. Mae rhywbeth ar goll ym mywydau nifer o’r cymeriadau ac mae’r gwacter yna’n drawiadol. Mae’r straeon yn adlewyrchu natur chwerwfelys bywyd bob dydd, ac mae hynny’n arwain at straeon heriol a hynod ddiddorol. A gwnaeth yr elfen o amwysedd yn niweddglo pob stori wneud i mi bendroni’n hir dros rai ohonyn nhw.



Mae gen i fy ffefrynnau o blith straeon y gyfrol, gydag ambell stori'n apelio oherwydd ei harddull yn ogystal â’r cynnwys. Ond dyna yw cryfder cyfrol o’r math yma – mae yna rywbeth sy’n sicr o apelio at bob darllenydd. Os nad ydych chi’n hoff o un stori, yna o fewn ychydig dudalennau cewch un sy’n fwy at eich dant.



Efallai nad llyfr hafaidd yw hwn o ran y cynnwys, ond mae’n gyfrol y gallwch chi ei mwynhau ar eich gwyliau, serch hynny, a'i darllen ar un eisteddiad neu bori ynddi bob hyn a hyn, ond byddwch yn barod i gael eich herio. ~Cerian Arianrhod @ www.gwales.com