Cyfres Academi Archarwyr: Melltith y Cwstard Cas

Dach chi’n barod am un arall o anturiaethau Crwtyn Cryf, Ffion Ffrisbi a Bari Brêns, heb anghofio Pwdin y ci? Ydyn, mae’r Archarwyr yn eu holau. Mae’r gloch wedi canu ac mae Ysgol y Nerthol ar fin dechrau. I mewn â ni!



Y tro hwn, Doctor Drwg ydi’r ... wel, y drwg yn y caws, ac mae’r athrylith gwyddonol gwallgo yn daer ei fod am ddifetha popeth efo’i gwstard cas. Yn wir, mae Doctor Drwg eisiau rheoli’r byd. A hithau yn amser cynnal arolwg, dyma’r peth olaf mae Miss Marblen, pennaeth yr ysgol, ei angen. Nid ysgol arferol ydi hon ar y gorau. Mae pethau’n mynd o ddrwg i waeth pan fo dryswch llwyr a sombis cwstard ymhob cwr! Ond does dim angen gofyn pwy sydd yn helpu i achub pawb o grafangau Doctor Drwg. A beth goblyn fydd barn yr arolygwyr am hyn oll?



Addasiad yw hon o gyfres Superhero School gan Alan MacDonald, ond mae hi’n gweithio i’r dim yn Gymraeg hefyd. Mae’r anturiaethau ynddi’n ddi-baid ac wrth i ni amau fod y strach wedi dod i ben, mae rhywbeth arall wastad yn dod i droi’r drol. Dyma hwyl a chwerthin rhwng dau glawr. ~Llinos Griffin @ www.gwales.com