Cyfres Academi Archarwyr: 1. Dial y Gelyn Gwyrdd

Bwriad y llyfr yma yw gwneud i blant chwerthin yn uchel. Mae’n gwneud hynny’n dda iawn. Mae’n stori sy’n llifo’n gyflym, yn hawdd darllen, ac yn gwbl, gwbl hurt.



Mae Siôn Botwm yn breuddwydio am fod yn archarwr, ond oes modd iddo wneud hynny? Wedi’r cyfan dim ond bachgen cyffredin yw e, bachgen cyffredin sy’n digwydd gallu rhag-weld digwyddiadau am fod ei glustiau'n cosi pan fo rhyw dro ar fyd! Mae Siôn yn derbyn llythyr gan Ysgol y Nerthol ac o fewn dim mae e, a'r darpar archarwyr eraill, yn brwydro yn erbyn y Gelyn Gwyrdd a’i gynlluniau dieflig.



Mae yna synnwyr cryf o’r abswrd yn y llyfr hwn, ac mae’r awdur yn cael hwyl gydag enwau, digwyddiadau a’r syniad o fod yn archarwr yn gyffredinol. Yn ôl y brifathrawes, Miss Marblen, yr hyn sy’n hanfodol i’w disgyblion yw “amynedd, disgyblaeth, a’r math iawn o deits”. A dweud y gwir mae rhaid i’r darpar archarwyr greu eu gwisgoedd ei hun, gan dalu sylw i’r cyfarwyddiadau yn y Llawlyfr Canllaw Archarwyr. Ac mae’r Gelyn Gwyrdd, er ei fod yn rhif 42 ar y rhestr o archdroseddwyr mwyaf peryglus y byhd, yn drewi’n barhaol o fresych ac yn cael ei alw'n dwmplen a siwgwr lwmp gan ei fam.



Mae’r llyfr cyntaf yma yn y gyfres Academi Archarwyr yn llawn hwyl, wrth i Siôn a’i ffrindiau newydd frwydro i achub yr ysgol a’r byd. Mae’r awdur yn deall yn iawn sut i wneud i blant chwerthin, sy'n dipyn o gamp. ~Cerian Arianrhod @ www.gwales.com