Cyfres Zoella: Merch Ar-Lein

Bywyd arferol oedd gan Penny yn y nofel Merch Ar-lein. Ond roedd ganddi gyfrinach, ac nid yw cyfrinachau wastad yn bethau da, fel mae Penny yn ei sylweddoli yn ystod y stori. Adeilada’r cyffro dudalen wrth dudalen, ac fe gadwodd fy niddordeb o’r dechrau i’r diwedd!



Ysgrifennai Penny am holl ddigwyddiadau ei bywyd ar ffurf blog, ar ôl iddi fod mewn damwain car efo’i rhieni. Roedd y blog yn ddienw, a dim ond ei ffrind gorau, Elliot, oedd yn ymwybodol o’i diddordeb creadigol cyfrinachol. Yn ystod y stori, mae rhieni Penny yn cael cynnig trefnu priodas grand yng ngwesty’r Waldorf, Efrog Newydd, yn null Downtown Abbey, dros ŵyl y Nadolig! Felly, dyma ddechrau antur o wyliau teuluol, ond ychydig a wyddai Penny y byddai’r gwyliau hyn yn newid ei bywyd am byth – ar-lein ac yn ei bywyd go iawn!



Ysgrifennwyd y nofel yma gan yr hynod boblogaidd Zoe Sugg, neu Zoella, o ddefnyddio ei henw ar-lein. YouTuber ydy hi, ac mae ganddi fwy na 12 miliwn o danysgrifwyr. Does ryfedd felly iddi droi ei llaw at ysgrifennu nofelau! Merch Ar-lein yw’r gyntaf mewn cyfres o dair nofel, ac maent i gyd mor gyffrous â'i gilydd, er bod hon ychydig yn well na’r lleill, yn fy marn i! Addaswyd y nofel i'r Gymraeg gan Eiry Miles ac mae'n addasiad llwyddiannus oherwydd mae'n llifo'n rhwydd ac yn hawdd ei ddarllen.



Credaf fod y llyfr hwn yn addas i ferched yn eu harddegau oherwydd gallant uniaethu â’r stori, gan ei bod yn sôn am y pwysau i wybod y gossip diweddaraf, a phwysau’r gymdeithas ar sut i edrych ac ymddwyn. Rwy’n argymell y nofel hon i unrhyw un sy’n hoff o antur a rhamant. Yn fy marn i, mae’r llyfr yn ardderchog ac yn dal diddordeb y darllenydd wrth ddilyn hynt a helynt bywyd Penny, yn ei chartref ym Mrighton ac yn America! ~Non Drake @ www.gwales.com