Cyfres Twm Clwyd: Esgusion Ardderchog (A Mwy o Stwff Da)

O’r cychwyn cyntaf un, mae hanes Twm Clwyd yn llamu atoch o’r llyfr. Dyma addasiad arall o gyfres Tom Gates gan enillydd ‘Funny Prize’ Roald Dahl, L. Pichon, ac mae cyfieithiad Cymraeg Gareth F. Williams yn un heb ei ail hefyd.



Tydi esgusion i beidio â gwneud gwaith cartref yn ddim byd newydd ym myd plant; er hyn, mae’r llyfr hwn yn gwneud i chi chwerthin yn uchel mewn dau funud o ddechrau ei ddarllen.



Byddwch yn chwerthin am oriau maith am helynt y ddannodd. A druan o Delia, chwaer fawr Twm, sy’n gorfod ymdopi â’r fath frawd!



Mae’r lluniau, y posteri a’r rhestrau hwyliog yn drwsgl dros bob man ar y tudalennau, yn debyg iawn i feddwl yr hen Twm wrth iddo wfftio pob rheol, osgoi ambell gerydd a gwneud gorchest o bob dim er budd y band.



Mae’r darllenydd yn carlamu trwy’r geiriau byrlymus, ac mae Twm yn gês ac yn un o’r rebels hoffus hynny sydd yn siŵr o’ch diddanu.



Mae’r ddawn dweud a'r addasiad Cymraeg hwylus yn benigamp - yn ‘jîniys’ a dweud y gwir! ~Llinos Griffin @ www.gwales.com