Cyfres Twm Clwyd: Byd Hollol Anhygoel Twm Clwyd

Tydi bywyd hogyn ddim yn hawdd. Mae angen i chi geisio cyrraedd i’r ysgol yn brydlon. Mae angen cuddio yng nghefn y dosbarth os ydych am ddarllen eich comics gorau. Mae angen osgoi sws gan Mam ar bob cyfri. A mwy na dim, mae angen cofio gwneud eich gwaith cartre. Ond ydi Twm Clwyd yn malio iot? Go brin!



Mae dyluniad y llyfr hwn yn helbul llwyr a Twm ydi’r un sy’n tynnu’r nyth cacwn hwnnw am ei ben. Yn llawn o frawddegau sionc, sgetsys sydyn a straeon di-ri, mae Twm yn dod yn gymeriad byw, llawn egni, ac yn fwrlwm o feddyliau – tipyn o lond llaw a dweud y gwir – a dyma sy'n gwneud i chi ddarllen yn eich blaen. Mae Twm yn cyfaddef fod ei ddiddordebau yw gwylltio ei chwaer, sef bod mewn band a bwyta wafferi caramel. Ydi wir, mae Twm yn fachgen drwg ar y naw!



Ymysg y lluniau mae llythyrau gan ei rieni a chan yr athrawon, adroddiadau ysgol a darnau o’i lyfrau ysgol, a'r rhain ar brydiau yr un mor ddoniol â’r stori ei hun. Mae’n rhaid i chi ddarllen hyd at y diwedd, hyd at y noson rieni ofnadwy honno, i weld y tameidiau trafferthus yn dod ynghyd.



Dyma lyfr rhwydd i’w ddarllen. Mae’n gyfrol a all codi calon unrhyw un ac yn un y gallwch ei chodi a’i gadael dro ar ôl tro. Ie wir, dyma gyfrol ddelfrydol i sbecian arni’n sydyn ... yng nghefn y stafell ddosbarth falle? ~Llinos Griffin @ www.gwales.com