Llyfrau Goleuo'r Dudalen: Byd y Goeden Afalau

Dyma gyfrol fechan yn y gyfres Llyfr Goleuo'r Dudalen, llyfr a grëwyd yn Saesneg gan Carron Brown ac Alyssa Nassner ac a addaswyd gan Elin Meek.



Mae'r syniad yn un syml iawn, sef defnyddio papur cymharol denau lle gellir gweld print tywyll oddi ar gefn y dudalen pan fo honno'n cael ei dal at y golau. Mae'r llun cyntaf yn enghraifft ragorol – gwelir y goeden yn ei dail ar y dudalen gyntaf, ond o ddal y darlun at y golau daw brigau moel yr ail dudalen i'r golwg gan ddangos y goeden yn foel a diaddurn.



Y mae amryw o'r cyfuniadau yn hynod ddeniadol a daw madfall a llyffant a phryfed genwair a phob math o greaduriaid i'r golwg unwaith mae'r ddalen yn cael ei chodi at y golau. Law yn llaw â'r darluniau clir y mae mymryn o destun llawn gwybodaeth ddefnyddiol. Rhy’r testun gyflwyniad clir i fyd gwyddonol ar gyfer plant cymharol ifanc, ac mae pytiau o wybodaeth hynod ddifyr fydd yn deffro chwilfrydedd y plant a'u rhieni.



Yn ychwanegol, fel atodiad i'r gyfrol, ceir dwy dudalen o wybodaeth ychwanegol am yr anifeiliaid a'r planhigion.



Dyma gyfrol werthfawr fydd yn gyflwyniad rhagorol i fyd gwyddonol. ~John Roberts @ www.gwales.com