Na, Nel!

Mae Nel yn ferch ddireidus ac yn y gyfrol hon mae tair stori ddigri. Mae ei rhieni'n gorfod gweiddi "e;Na, Nel!"e; arni'n aml! Addas ar gyfer darllenwyr 7 i 9 oed ond i'w mwynhau gan blant o bob oed! ~Publisher: Y Lolfa

Cyfrol a fydd yn apelio at ferched yn bennaf yw hon ac yn cynnwys tair stori fer am Nel, y ferch fach ddireidus. Un stori fawr oedd bywyd Nel, o’r diwrnod y cafodd ei geni yn annisgwyl ar lawr yr eil duniau yn yr archfarchnad (a byth oddi ar hynny roedd y teulu’n cael disgownt ar duniau cawl tomato!). Mae gan Nel ddychymyg byw, mae’n hollol anhydrin ar brydiau – yn gallu creu hafoc, yn anghonfensiynol, yn chwareus ac yn anrhagweladwy, a’i hymddygiad weithiau yn ddigon i wylltio ei rhieni. Ond y mae hefyd yn gymeriad hoffus.



Cryfder y gyfrol hon yw ei bod mor Gymreig o ran cynnwys ac ieithwedd. Cyfeirir at stori Blodeuwedd a chymeriadau cyfarwydd fel Sali Mali a'r Dewin Dwl. Sonnir am artistiaid o Gymru fel Aneurin Jones, Kyffin Williams a Shani Rhys James. Ac onid yw’r gân y mae Nel yn ei chanu, ‘Mae gen i gariad / Sos coch yw hwnnw!’, yn ein hatgoffa o un o ganeuon Tony ac Aloma?



Cyn bwysiced hefyd yw gallu’r awdur i gyflwyno cyfoeth iaith i blant ifanc trwy’r cymariaethau a’r priod-ddulliau sy’n britho’r tudalennau, er enghraifft: Nel yn siffrwd ei hamrannau’n gyflym fel adenydd pilipala; y peiriant cymysgu bwyd yn troi a throi fel coesau balerina; gwallt Nel yn gyrls fel sbrings ar hen wely; Nel yn symud fel jeli mawr ar sgwter; brân yn crawcian; blaidd yn udo, a menyn ddim yn toddi yn ei cheg.



Roedd darllen hanesion Nel yn fy atgoffa am ferch fach ddrygionus o Sweden ddaeth yn enwog mewn llenyddiaeth plant, sef Pippi Långstrump, neu Pippi Hosan Hir.



Tybed a gawn ni fwy o lyfrau am hanesion Nel? Rwy’n siŵr y byddai’r merched bach wrth eu bodd. ~Menna Lloyd Williams @ www.gwales.com