Stori Sydyn: Oswald

Teitl yn y gyfres o gyfrolau byr a chyflym Stori Sydyn. Newyddiadurwr yw Oswald sy'n ysgrifennu teyrngedau mewn papur newydd i'r ymadawedig. Caiff y sac o'i swydd wedi iddo lunio teyrnged i gariad ei fam nad oedd wedi marw. Mae'n byw bywyd unig gan ddilyn ei obsesiwn ag angladdau. Dyma stori ei ymdrech i ryddhau ei hun o'i obsesiwn. ~Publisher: Y Lolfa

Anodd yw dychmygu byd heb hiwmor – a diolch am hynny. Mae chwerthin fel chwa o awyr iach yn y gwanwyn, a gall gwên godi calon. Rhaid cydnabod mai tipyn o gamp yw ceisio pwyso a mesur yr hyn sy’n peri i rywun wenu neu chwerthin. Gall gair, gweithred a sefyllfa esgor ar ddoniolwch, ond tasg amhosibl yw cofnodi cynhwysion digrifwch ar bapur ar ffurf rysáit.



Edwino wnaeth y cyfleoedd i ddod ynghyd er mwyn clebran ac adrodd storïau yn ein cymunedau yn y blynyddoedd diweddar, a chiliodd y cymeriadau ffraeth o'n cymdeithas. Pleser, felly, oedd cwrdd ag Oswald Myrddin Jones yn un o gyfrolau Stori Sydyn 2014. Cafodd Lleucu Roberts afael ar nifer o elfennau digrifwch a llwyddodd i’w trafod yn ddeheuig, gan greu cymeriad credadwy.



Amlygir ei chrefft o drin geiriau yn gyson a defnyddir cymhariaeth a dihareb yn gelfydd. Lluniodd olygfeydd cofiadwy a phortreadau cryno. Nid oes angen llawer o ddychymyg i weld Oswald yn y gegin yn blasu’r bwydydd o ben draw’r byd ond a ddaeth mewn gwirionedd o fwyty Indiaidd cyfagos. Mae ei ymateb i’r danteithion dieithr a’r sgwrs ag Amy yn cymell gwên. Cynildeb yr hiwmor yn aml yw’r allwedd i lwyddiant y gyfrol.



Awgrymir natur ac ymddygiad Oswald gan gyfeiriadau digon di-nod ar un olwg ond cyfeiriadau sy’n portreadu’r cymeriad i’r dim. Meddyliaf yn arbennig am ei ymdrech i blygu ei gôt ar y trên, y gofal wrth fesur faint o siwgwr mae'n ei roi yn ei de, a’r ffaith ei fod yn ddyn un siwmper. Mae dawn Lleucu Roberts i sylwi ar y manion hyn yn fodd i’r darllenydd ddod i adnabod Oswald yn well.



Plethwyd y digri a’r difri er mwyn trafod gwirioneddau am gyfrinachau ac am bethau pwysig bywyd, a chyflwyno ambell gyd-ddigwyddiad anesboniadwy. Crybwyllir bod gan Oswald wersi i’w dysgu. Hyderaf y daw cyfle eto i gwrdd â’r cymeriad o Abertawe ag inc yn ei waed. Gall Oswald brofi’n olynydd teilwng i gymeriadau cofiadwy a luniwyd gan awduron megis Harri Parri a Wil Sam. ~Trefor Jones @ www.gwales.com