Cyfres Mellt: Rhaffu Celwyddau

Un o nofelau ar gyfer 12-15 oed. Mae'n adrodd hanes Non sy'n gorfod dod i delerau a newyddion syfrdanol am ei thad. Nofel sensitif, gyfoes, sy'n codi nifer o gwestiynau.A contemporary, sensitive novel portraying Non, a young girl coming to terms with astounding news about her father, for 12-15 year old readers. ~Publisher: Y Lolfa

Ar ddiwrnod pen-blwydd Non yn 16 oed caiff ei thad ddamwain ddifrifol yn ei waith. Sylwa Non nad yw grŵp gwaed ei thad yr un grŵp â hi ac oherwydd prosiect a wnaeth yn yr ysgol mae hi’n sylweddoli nad yw'n dad biolegol iddi. Mae gweddill y stori yn olrhain taith boenus ac emosiynol Non i ddarganfod ei gwir wreiddiau.



Mae’r nofel yn dechrau gydag arddeliad, yn dal diddordeb y darllenydd yn syth, ac yn parhau i droi’r tudalennau hyd y diwedd. Llwydda Gwenno Hughes i fynd dan groen merched yn eu harddegau, ac mae hi’n ymwybodol o’r ddrama feunyddiol sydd yn eu poeni ac yn llywio eu bywydau. Mae hi’n delio’n onest ac yn ddiflewyn-ar-dafod gyda bywyd cyfoes – colur, gwallt, ffonau symudol, alcohol a rhyw. Mae hi hefyd yn trin pynciau anodd a dirdynnol mewn dull aeddfed a sensitif, heb fod yn sentimental nag yn nawddoglyd. Mae’r arddull ysgrifennu yn weledol iawn, a’r stori yn ymagor fel ffilm; mae yma eirfa goeth a phriod-ddulliau lliwgar.



Tua diwedd y nofel mae Non yn penderfynu ymgyfeillachu â’i thad naturiol, ac mae ei hagwedd bryd hynny, yn dweud nad yw o fusnes i’w mam a’i thad, yn sicr o fod yn ysbrydoliaeth ac yn fodd i roi hyder i bobl ifainc eraill yn yr un sefyllfa sy’n chwilio am eu rhieni biolegolwaed. ~Eiry Palfrey @ www.gwales.com