Teulu

Triongl cariad tanbaid sydd wrth wraidd y nofel hon a leolwyd yn ardal Aberaeron. Mae'r stori yn mynd a chi yn ol mewn amser i weld sut y dechreuodd perthynas Margaret a Dr John am y tro cyntaf a sut y bu i Richard ddod ar eu traws. Dyma rai o gymeriadau poblogaidd y ddrama Teulu ar S4C mewn nofel sy'n addas i bawb. ~Publisher: Y Lolfa

Ar drothwy cyfres deledu olaf Teulu dyma nofel boblogaidd sy’n atodiad i’r gyfres ac sy’n siŵr o daro deuddeg. Mae hi’n rhagflaenu’r gyfres deledu gan fynd â ni’n ôl i ddyddiau ieuenctid Margaret Caeffynnon a’i ffrind bore oes John, sy'n fab i was y teulu. Craidd y stori yw bod y closio rhwng y ddau heb blesio’i thad. Mae ganddo ef drefniadau a gobeithion amgen i’w ferch. A’r cwestiwn mawr yw a fydd Margaret yn ddigon cadarn i ddilyn ei chalon neu i blygu tan bwysau teuluol?



Canolbwyntir yn bennaf ar dri chymeriad adnabyddus o’r gyfres, sef Margaret (Mair Rowlands yn y gyfres), John (Rhys Parri Jones) a Richard (William Thomas). Mae’r tri gryn dipyn yn iau, yn ddibrofiad ac yn llai soffistigedig na’r rhai a welwyd gyntaf yn y gyfres yn 2006 ac o’r herwydd yn ei chael hi’n anodd gwahaniaethau rhwng rhamant a chariad.



Profodd Teulu, a ffilmir yn Aberaeron i fod yn un o gyfresi drama mwyaf poblogaidd S4C. Mae’r stori, gan Meic Povey a Branwen Cennard, yn orlawn o gynllwyn teuluol a chymdeithasol gyda sawl sgerbwd yn cuddio mewn gwahanol gypyrddau. Adlewyrchir hyn yn y nofel gyda’r gwrthdaro parhaus rhwng teuluoedd, rhwng gwerthoedd a theyrngarwch, traddodiad, dosbarth cymdeithasol a rhyddid cydwybod.



Aethpwyd ati’n fwriadol i ganoli’r digwyddiadau mewn lleoliad go iawn gyda’r cyfan yn troi o gwmpas gwesty, meddygfa a thŷ bwyta yn Aberaeron. Ac mae’r nofel wedi ei seilio ar y wlad o gwmpas y dref yn ogystal â’r dref ei hun. Mae’r syniad o angori’r gyfres wrth le go iawn yn un o'i chryfderau. Mae’r digwyddiadau rhwng dau glawr lawn mor gyffrous â’r hyn a welir ar y sgrin.



Bydd y nofel hon yn apelio at selogion y gyfres, gwylwyr achlysurol a’r rheiny sydd heb eto gael y pleser o’i gwylio. Fe’i disgrifir fel ‘Nofel fachog â charwriaeth dymhestlog wrth ei chalon.’ Ac mae disgrifiad Caryl Lewis yn berffaith gywir. Yn hytrach nag adrodd digwyddiadau a welwyd ar hyd y gyfres mae hi’n sefyll ar ei phen ei hun fel stori gwbl ar wahân. Mae hi felly’n atodiad derbyniol iawn ar drothwy’r gyfres olaf.



Cryfder y gyfres deledu yw’r briodas lwyddiannus rhwng y cymeriadau dychmygol a’r castio. Maen nhw’n gymeriadau cyflawn, crwn a bortreadir gan rai o’n hactorion amlycaf, mwyaf galluog a mwyaf profiadol. Dydi’r nofel ddim yn gwanhau’r un iot wrth i’r cymeriadau fod yn rhai papur, o ran cyfrwng. Wrth ddilyn eu helyntion daw wynebau a lleisiau’r actorion sydd wedi – ac sydd yn dal – i’w portreadu, yn fyw yn ein dychymyg. ~Lyn Ebenezer @ www.gwales.com