Cyfres y Dderwen: Y Ddwy Lisa - Sgrech y Dylluan

Mae Y Ddwy Lisa yn adrodd hanes Lisa Angharad a Lisa Marie, y ddwy ar yr wyneb yn gymeriadau hollol wahanol i'w gilydd. Ond mae bywydau'r ddwy'n dod ynghyd mewn modd tywyll sydd y tu hwnt i realiti. Nofel sy'n dal gafael hyd at y diwedd. ~Publisher: Y Lolfa

Adrodd hanes dwy Lisa mae nofel newydd Gareth F. Williams, a dyw hynny’n fawr o syndod efallai o ystyried teitl y nofel. Ond tra bod y ddwy yn rhannu’r un enw, mae ei bywydau ar yr wyneb yn wahanol iawn i'w gilydd. Tŷ mawr yn y wlad yw cartref Lisa Angharad, tra bod Lisa Marie yn byw mewn tŷ teras ar stad dlawd. Starbucks, y sinema a’i ffrindiau yw diddordebau Lisa Angharad tra bod Lisa Marie yn Goth ag arddeliad. Ond wrth ddysgu mwy am fywydau’r ddwy, a gwylio’u llwybrau’n croesi yn y modd mwyaf annisgwyl, gwelwn fod gan y ddwy lawer mwy yn gyffredin na’r disgwyl.



Yn bendant, mae yna elfennau tywyll i’r nofel, wrth i elfennau o fywydau pob dydd y ddwy gael eu gweu yn gelfydd gyda chwedlau tylwyth teg ac ofergoelion. Bydd unrhyw un sy’n mwynhau nofelau Stephanie Meyer yn sicr o gael blas ar yr haenau hyn yn y stori. Gall yr awdur greu golygfeydd gwirioneddol gofiadawy, llawn tensiwn, fel y brotest ar stad Lisa Marie. Fel darllenydd roeddech chi'n teimlo eich bod yno yng nghanol anniddigrwydd yr awyrgylch. Ond gwir gamp Gareth F. Williams yw creu cymeriadau crwn a chredadwy y gall y darllenydd uniaethu a chydymdeimlo â hwy. Mae cydblethiad y ddwy elfen, y cymeriadau byw a’r haenau tywyll, yn creu nofel sy’n dal diddordeb y darllenydd tan y diwedd. ~Mari Siôn @ www.gwales.com