Cyfres Stori Sydyn: Jackie Jones

Nofel yn y gyfres o gyfrolau byr a chyflym Stori Sydyn. Stori ddirgelwch yw hon am y gyfreithwraig Jackie Jones, sy'n byw ei bywyd cymdeithasol ar y we. Er cymaint yw'r hwyl mae'n ei gael ar wefan rhwydweithio cymdeithasol mae mewn peryg o golli llawer mwy ... ~Publisher: Y Lolfa

Mae denu pobl i ddarllen llyfr yn mynd yn fwyfwy anodd y dyddiau hyn, gyda’r holl ddatblygiadau ym maes technoleg yn cynnig ffyrdd gwahanol o ddysgu a hamddena, a chymaint o bethau eraill i fynd â bryd pobl. Cyfres a gyflwynwyd i geisio annog pobl nad ydynt yn darllen fel arfer i wneud hynny yw cyfres Stori Sydyn, sy’n gynllun ar y cyd rhwng Sgiliau Sylfaenol Cymru a Chyngor Llyfrau Cymru. Mae’r llyfrau byrion hyn wedi’u hysgrifennu gan awduron poblogaidd i ennyn diddordeb darllenwyr newydd, ailgynnau’r diddordeb ymysg rhai a arferai ddarllen ac unrhyw un sydd am lyfr y gellir ei ddarllen yn sydyn.



Nofel fer, gyffrous, gan tudalen yn y gyfres hon yw Jackie Jones gan Caryl Lewis. Cyfreithwraig lwyddiannus yw Jackie sydd wedi datblygu enw iddi’i hun am ei gallu i amddiffyn drwgweithredwyr yn llwyddiannus. Ond er ei gyrfa ddisglair, nid yw pethau cystal yn ei bywyd personol. Mae ei phriodas newydd ddod i ben, mae ei ffrind gorau yn orddibynnol arni ac mae ei chyd-weithiwr yn dechrau cymryd diddordeb ynddi ar lefel bersonol. Ac nid yw’r ffaith ei bod hi’n llwyddo i sicrhau rhyddid i lawer o ddrwgweithredwyr yn gwneud Jackie yn boblogaidd gan bawb.



Cefais flas ar y nofel fel holl nofelau Caryl Lewis mae wedi’i sgwennu’n dda ac yn ddifyr. Mae yma stori gref sy’n cydio yn y dychymyg, yn gafael o’r cychwyn ac ro’n i’n awyddus i wybod beth oedd yn mynd i ddigwydd nesaf. Mae’r nofel yn darllen yn rhwydd ac mae yna bethau annisgwyl yn digwydd sy’n cadw rhywun ar flaenau ei draed. Yn naturiol, o gofio diben y gyfres, mae’r stori’n gymharol syml ond nid yw hyn yn tynnu dim oddi ar y nofel gall unrhyw ddarllenydd ei mwynhau, o’r sawl sy’n troi at lyfr am y tro cyntaf ers hydoedd i’r darllenydd profiadol sydd am dreulio awr neu ddwy yng nghwmni llyfr difyr. Os oes gwendid o gwbl, ro’n i’n teimlo braidd fod pethau’n cael eu datrys yn rhy gyflym a chyfleus ar ddiwedd y stori a’r darnau’n disgyn i’w lle yn rhy hawdd rywsut. Ond eto, o gofio natur a diben y gyfres, ac mai nofel fer yw hon, mae’n debyg fod hynny i raddau yn anochel. Ond mae’r nofel yn werth ei darllen, yn gyffrous, ac am £1.99 yn unig, yn fargen a hanner. ~Nest Gwilym @ www.gwales.com