Stori Sydyn: Cymry yn y Gemau Olympaidd

Cyfrol sy'n olrhain hanes y Cymry a fu'n llwyddiannus dros y blynyddoedd - yr 20 medal aur, 11 arian ac 18 efydd, hyd yn hyn ... ~Publisher: Y Lolfa

Dyma gyfrol arall yn y gyfres hynod boblogaidd Stori Sydyn gan y Lolfa. Mae nifer o’r llyfrau yn y gyfres hon yn trin a thrafod enwogion ym myd chwaraeon gyda’r bwriad o ddenu darllenwyr a fyddai, efallai, yn ei chael hi’n anodd canfod rhywbeth at eu dant ymysg cynnyrch y byd cyhoeddi Cymraeg.



Fel un sy’n ystyried agor pecyn o fisgedi siocled yn dipyn o ymrafael, roedd darllen am gampau athletwyr megis Colin Jackson a enillodd 25 medal ym mhrif gampwriaethau ei faes yn ystod ei yrfa (er mai un fedal Olympaidd sy’n eu mysg – y fedal arian a enillodd yn Seoul yn 1998), yn agoriad llygad. Felly hefyd gampau enwogion megis Lynn Davies, Tom Lucy, Geraint Thomas a David Davies. Mae’r bennod sy’n olrhain gyrfa ddisglair Tanni Grey-Thompson yn sicr o godi cywilydd ar y rhai diog yn ein mysg – mae hi wedi ennill 16 o fedalau Olympaidd, gydag 11 o’r rheini’n fedalau aur!



Nid yr enwau ‘mawrion’ yn unig sy’n cael eu crybwyll yn y gyfrol hon: ynddi ceir nifer o enwau cwbl ddieithr i mi – pobl megis Paulo Radmilovic, a adnabyddir fel ‘Siarc y Taf’, ac a enillodd nifer o fedalau am nofio ac am chwarae polo dŵr ym mlynyddoedd cynnar yr ugeinfed ganrif.

Ceir pennod fer ar ddechrau’r llyfr yn adrodd peth o hanes y gêmau Olympaidd modern. Ac mae pob math o gampau megis marchogaeth a bocsio yn cael eu dathlu yn y gyfrol fechan a difyr hon, ac mae’n syndod faint o Gymry sydd wedi gwneud eu marc yn y gêmau Olympaidd.



Mae’r iaith yn syml ac yn rhwydd i’w darllen. Dyma lyfr sydd wedi dysgu llawer i mi. Byddaf yn rhoi tipyn mwy o sylw i’r digwyddiadau yn Llundain ym mis Awst yn sgil ei ddarllen. ~Janice Jones @ www.gwales.com