Twm Bach ar y Mimosa

Yn 1865 teithiodd cwch o’r enw’r Mimosa draw i Batagonia bell. Ar y cwch, roedd Cymry. Wrth gyrraedd, 'roedd lleisiau’n crynu, a dagrau o hapusrwydd yn llygaid sawl un'. Yn y llyfr hwn, mae hanes un bachgen a deithiodd ar y Mimosa a chawn ei hynt a’i helynt wrth i’w fyd newid am byth.



Ond gan ddechrau o’r dechrau, anodd iawn yw hi i Daniel adael ei ffrind gorau, Twm Hopcyn, ar ôl yn Aberdâr, ond mae Twm yn rhoi anrheg arbennig iawn iddo cyn iddo adael Cymru – Twm Bach, bachgen wedi'i greu o bren. Difyr dros ben yw gweld y daith hon trwy lygaid y ddau wrth iddynt gyfarfod cymeriadau fel Seth, a gweld rhyfeddodau megis morfilod anferth o fwrdd y llong.



Mae Dan yn tynnu lluniau Twm Bach yn ei lyfr er mwyn eu hanfon yn ôl at Twm Hopcyn, ac mae’r lluniau syml a naturiol hyn yn ychwanegu at hyfrydwch y stori hon. Ond y tu ôl i stori Daniel, mae hanes epig y penderfyniad anodd i deulu Cymraeg fynd yr holl ffordd i dde America, a'r rheswm dros eu penderfyniad pwysig. Ceir hefyd sôn am y gŵyr o Gymru aeth drosodd cyn taith y Mimosa, straeon am gyfarfod yr Indiaid brodorol a’r tir sych ac anodd i'w drin a oedd mor wahanol i Gymru. A wnaiff teulu Dan setlo yno am byth?



Mae hon yn stori hyfryd wedi'i hadrodd yn syml a theimladwy, ac yn adnodd i gynorthwyo plant ddysgu hanes y Cymry a’r Wladfa. Mae'n sicr yn llenwi ambell dwll yn nychymyg pob un ohonon ni am y daith ddewr honno dros 150 o flynyddoedd yn ôl. ~Llinos Griffin @ www.gwales.com