Hwrê, Mae Hi'n Wyliau!

Mae’n amlwg fod Beirdd Plant Cymru’n hoffi cyfansoddi cerddi am wyliau! Yn y gyfrol ddifyr hon, ceir dros ddeg ar hugain o gerddi am y pwnc. Yn wir, mae Anni Llŷn, Bardd Plant Cymru’r presennol a golygydd y gyfrol, yn dechrau’r cyflwyniad drwy ddweud,



“Mae pawb yn hoffi gwylia, hyd yn oed beirdd.”



Fe fydd gan bawb ei ffefryn mewn cyfrol fel hon, ac, wrth gwrs, mae hynny'n rhywbeth i’w glodfori. Mae yma gerddi byr, cerddi bachog, rhai doniol a digri ac ambell un ddwys; rhai yn odli a rhai yn gwbl rydd, y cyfan yn cymysgu gyda’i gilydd i greu cyfanwaith amrywiol sy’n siŵr o ddiddanu plant (a rhieni) o bob cwr o Gymru.



Mae’r gyfrol hon yn rhyw fath o ddilyniant i’r gyfrol boblogaidd Geiriau Bach Chwareus a gyhoeddwyd gan Garreg Gwalch y llynedd. Casgliad o farddoniaeth gan wahanol Feirdd Plant Cymru dros y blynyddoedd diwethaf a geir yma, ac mae’n ddiddorol gweld arddulliau amrywiol y gwahanol feirdd yn amlygu eu hunain drwy’r cerddi. Yn ogystal â cherddi gan Anni Llŷn ei hun, ceir cerddi gan dri ar ddeg o feirdd adnabyddus, fel Ceri Wyn Jones, Eurig Salisbury, Caryl Parry Jones a Mererid Hopwood, ymysg eraill. Mae’n dda cael darllen rhai cerddi a gyfansoddwyd ar y cyd gyda disgyblion mewn gwahanol rannau o Gymru. Dyma bennill o gerdd a gyfansoddwyd gan Ifor ap Glyn a disgyblion Ysgol Maelgwyn, Llandudno:



I Aberdyfi un diwrnod, daeth tyrfa fawr gerbron,

I ddewis brenin Gwynedd drwy’r gystadleuaeth hon:

Sef aros am yr hiraf ar gadair yn y lli

A’r un heb ffoi na boddi a fyddai’n mynd â hi.



Ac er taw gwyliau yw’r prif thema, mae’r amrywiaeth o destunau sydd yn y gyfrol hefyd yn agoriad llygad. Ceir cerddi am wyliau yma yng Nghymru a thramor, gwyliau yng nghmwni gwahanol aelodau o’r teulu, gwyliau mewn pabell, mewn gwesty, a hyd yn oed gwyliau aros adre. A phwy all anghytuno gyda Myrddin ap Dafydd pan mae’n dweud:



Mae’n wyliau. Maen nhw o hyd, o hyd,

Yn chwilio am nefoedd ym mhen draw’r byd.

Beth sydd o’i le – dim ond un waith –

Ar feddwl am wyliau heb feddwl am daith? ~Hefin Jones @ www.gwales.com