Geiriau Bach Chwareus

Mae’n bwysig iawn cael amrywiaeth helaeth o lyfrau sy’n apelio, er mwyn cadw diddordeb plant a’u hannog i fwynhau darllen. Ac rwy’n siŵr y bydd y gyfrol hon yn apelio at blant o bob oed gan ei bod yn canolbwyntio’n llwyr ar chwarae a chwaraeon.



Er mai llun o Anni Llŷn, bardd plant presennol Cymru, sydd ar glawr y gyfrol, casgliad o farddoniaeth gan feirdd plant a gawn yma, gyda cherddi gan gyfranwyr eraill fu'n cydweithio â phlant ledled Cymru. Ac yn wir, ceir amrywiaeth dda o feirdd yma, o Menna Elfyn a Myrddin ap Dafydd i Mari Løvgreen a Dewi Pws.



Mae’r rhan fwyaf o’r cerddi’n ddoniol, ac mae cerdd Cameron Jenkins, gyda chymorth Caryl Parry Jones, yn enghraifft dda o hynny. Yn ôl y disgwyl gan feirdd mor brofiadol, mae llawer o chwarae ar eiriau yma, ac maent yn aml yn dangos eu dyfeisgarwch wrth odli. Yn wir, mae cerdd ‘Price Drws Nesa’ gan Mererid Hopwood yn sôn am yr union beth hynny.



Mae’r cerddi sy'n cynnwys cyfraniadau gan blant ysgol yn ddiddorol hefyd am eu bod yn rhoi blas i ni ar rai o ddiddordebau plant heddiw a'r hyn sy’n bwysig iddyn nhw. Mae pêl-droed, wrth gwrs, ar frig y rhestr, ac mae ‘Arwyr 2016’ yn adlewyrchu’r cynnwrf presennol wrth i'r tîm cenedlaethol gamu yn ei flaen ym mhencampwriaeth Ewro 2016.



Ond mae mwy na’r doniol a’r digri yma hefyd, wrth i nifer o’r cerddi’n sôn am brofiadau mwy annymunol, fel ‘Dewis Tîmau’ gan Ceri Wyn Jones, cerdd sy’n siŵr o daro tant â llawer ohonom, yn blant ac yn oedolion.



Mae’r gair olaf yn y gyfrol yn mynd i Meirion MacIntyre Huws, ac mae pennill olaf ei gerdd yn codi cwestiwn pwysig:



Gofynnais wrth Mrs Williams,

(Sy’n gwybod pob peth yn y byd),

"Os mai cymryd rhan sy’n bwysig

Pam cadw sgôr o hyd?" ~Hefin Jones @ www.gwales.com