Cyfres Bling: Dw i Eisiau Bod yn Enwog

Wyddoch chi beth oedd enw albwm cyntaf Duffy?



Oeddech chi’n gwybod mai dim ond un llun werthodd Van Gogh yn ystod ei oes?



Hoffech chi wybod beth yw tips Connie Fisher er mwyn medru canu’n dda?



Mae Dwi eisiau bod yn enwog! yn rhan o BlinG, cyfres o lyfrau darllen ffeithiol sy’n cyflwyno gwybodaeth mewn pytiau difyr a diddorol. Mae’r llyfr yn llawn ffeithiau am bobll enwog, o Gymru a gweddill y byd, o Shaheen Jafargholi, i Simon Cowell! Bydd unrhyw un sydd â sêr yn ei lygaid yn mwynhau’r llyfr yma, ac mae hefyd yn llyfr da i'w drafod yn y dosbarth.



Mae’n edrych ar ddwy ochr enwogrwydd, yr ochr dda mae pawb yn ei gweld - y dillad, yr arian, a’r partïon, ond mae hefyd yn dangos nad yw bywyd o'r fath yn fêl i gyd. Mae pobl yn gallu dioddef straen, gorweithio a chael sylw negyddol gan y cyfryngau.



Mae’n llyfr lliwgar iawn, yn gymysgedd o luniau a ffeithiau di-ri. Gallwch gydio ynddo a darllen tameidiau bach ar y tro, ac mae’n werth cofio’r gair o gyngor sydd ar y diwedd - byddwch yn garedig ac yn glên wrth bawb wrth ddringo’r ysgol. Mae’n bosib iawn y byddwch yn cwrdd â nhw eto ar eich ffordd i lawr! ~Erin Gruffydd @ www.gwales.com