Mae'r Cyfan i Ti

Yn awdur ac arlunydd llyfrau stori-a-llun o’r radd flaenaf, mae gwaith ffres a thrawiadol Luned Aaron wedi hen ennill ei blwyf bellach ar ein silffoedd. Enillodd ei chyfrol gyntaf, ABC Byd Natur, wobr Tir na n-Og, ac â’r gyfrol hon, Mae’r Cyfan i Ti, â ni i’r un tir uchel.



Mae hon yn gyfrol stori-a-llun hynod safonol, wrth i’r awdur dywys plentyn drwy ddiwrnod ar ei hyd. Yn syml a sensitif iawn o ran y dweud, mae ei harddull mydr ac odl ddiniwed yn ddelfrydol ar gyfer oed meithrin, gan gyfleu’r elfen o ryfeddod sy’n perthyn i agwedd plant o’r oed hwnnw at y byd o’u cwmpas i’r dim. Caiff hynny wedyn ei gyfuno â nostalgia ac elfen o gyfrifoldeb o du’r oedolyn sy’n cynnal ymgom â’r plentyn drwy gydol y gyfrol.



Tanlinella deitl y gyfrol fyrdwn y stori mewn gwirionedd. Wrth i’r awdur ddefnyddio’i synhwyrau dynnu sylw’r plentyn at holl gyfoeth byd natur o’i gwmpas – y blodau a’r adar, y pryfed a’r pysgod, y ffrwythau a’r awyr – pwysleisia hefyd mai dyma yw ei etifeddiaeth a’i ddyfodol. Mae’r lliwiau a’r holl aroglau’n hudolus ac yn bethau i’w gwerthfawrogi bob dydd, ond eto’n fregus. Ceir awgrym, felly, fod gan yr oedolyn gyfrifoldeb i amddiffyn yr holl ryfeddodau yma ar gyfer y genhedlaeth i ddod: ‘Mae’n fyd o ryfeddod, a’r cyfan i ti’. O’r pethau bychain y daw’r cyfoeth mwyaf, yng ngolwg yr awdur.



Ochr yn ochr ochr â diniweidrwydd y dweud, ceir diniweidrwydd hefyd yn y lluniau hyfryd sy’n cyd-fynd â’r testun. Mae’r lliwiau’n ffres a’r delweddau’n amrywio o luniau clytwaith syml i arddull mwy peintiedig a medal. Yn ychwanegol at hyn hefyd, mae tudalen olaf y gyfrol yn cynnwys fersiwn Saesneg o’r testun ar ffurff cyfieithiad yn hytrach na mydr ac odl, sy’n agor y drws ar gynulleidfa ehangach.



Cyfrol gwtshlyd, berffaith i’w darllen cyn mynd i gysgu, fydd yn eich gadael yn teimlo’n gynnes ac yn fodlon iawn eich byd, beth bynnag eich oedran. ~Sioned Lleinau @ www.gwales.com