Trysorfa Chwedlau Cymru

Ystyr ‘trysorfa’ yw rhywle i storio trysor, ac yn wir i chi, mae’r llyfr hwn yn llawn trysorau! Chwedlau a straeon wedi’u hailadrodd yn gelfydd a manwl, gwledd i’w darllen i chi eich hun neu eu darllen yn uchel i’r plant iau. Ac mae’r clawr caled, trwm a lluniau urddasol Brett Breckon wir yn gwneud i chi deimlo eich bod yn dal trysor yn eich llaw!



Mae yma chwedlau sy’n hen ffefrynnau, yn ogystal â chwedlau y mae gennych ryw syniad o’r stori ond bod y manylion wedi mynd yn angof, a chwedlau nad ydw i wedi’u clywed ers fy mhlentyndod. Camp Tudur Dylan Jones yw rhoi cig ar asgwrn y storïau a dod â’r cymeriadau’n fyw, a hynny mewn ffordd mor ddifyr a gafaelgar. Braf iawn yw darllen llyfr Cymraeg i blant sy’n parchu eu gallu i ddeall yr iaith ar ei gorau, heb symleiddio’r ieithwedd a’r eirfa, ond yn hytrach yn cyfoethogi ac yn ymestyn eu hiaith.



Yr hyn sy’n wych am y chwedlau hyn, wrth gwrs, yw eu bod yn perthyn i ni, yn perthyn i Gymru, a bod eu gwreiddiau yn ddwfn mewn mannau penodol yn ein gwlad, o Ynys Cybi yn Sir Fôn, i Ben Llŷn a Llyn Tegid yn y Bala, i Dre Taliesin, Dyffryn Tywi a Chastellnewydd Emlyn, ac i Gors-las yn Sir Gaerfyrddin.



A yw’r chwedlau hyn yn dal yn berthnasol i ni heddiw? Ydyn nhw’n dal i ddiddanu ac ennyn diddordeb darllenwyr ifanc? Neu a yw hud a lledrith wedi dyddio, a wfftio ar bobl sydd â phwerau arbennig? Tybed beth yw barn Hollywood ar hynny? A barn holl gynulleidfaoedd y sinema pan ddangosir ffilmiau fel Harry Potter a Spiderman? Tybed pa chwedl yn y llyfr fyddai orau i’w throsi’n ffilm? Neu ai aros yn hudoliaeth byd y geiriau a’ch dychymyg eich hun fyddai orau?



Nid wyf yn rhy hoff o’r llun a ddewiswyd ar gyfer clawr y llyfr; mae’n codi arswyd arnaf braidd, ond barn bersonol yw hynny! Ond nid oes amheuaeth fod hon wir yn gyfrol i’w thrysori. ~Gwenllïan Dafydd @ www.gwales.com