Merch y Mêl

O am lyfr hyfryd! O’r funud rydych yn gafael yn y llyfr clawr caled a throi’r papur trwchus, fe wyddoch eich bod yn byseddu clasur Cymraeg. Ac yn nwylo meistrolgar yr awdur Caryl Lewis a’r arlunydd dawnus Valériane Leblond cawn wledd o ddarllen mewn stori pum munud.



Mae geiriau a stori Caryl Lewis mor afaelgar, a’r pum synnwyr yn dod yn fyw wrth adrodd stori Elsi a’i blwyddyn gyntaf gyda’i mam-gu. Mae Elsi wedi cael ysgytwad a hithau, fel y dywed ei mam-gu, ‘yn cryfhau ar gyfer y gwanwyn’. Cawn ddilyn ei hanes wrth i’r gwenyn ar waelod yr ardd ei helpu i adfer ac i werthfawrogi’r byd natur yn yr ardd.



Yr ysgogiad gan yr awdur i lunio’r stori, o’r hyn a ddeallaf, yw pryder nad yw plant yr oes sydd ohoni yn ymwneud digon â byd natur, a bod eu gwybodaeth yn brin iawn am y byd o’n cwmpas. Mae’r stori hon yn sicr yn gam pwysig tuag at lenwi’r bwlch hwnnw, gan gyflwyno gwybodaeth mewn ffordd dawel, heb i’r darllenydd sylwi bron, a bydd hyn yn sicr o annog diddordeb o’r newydd ym myd natur.



Mae’r lluniau manwl yn ychwanegu at awyrgylch ledrithiol y stori ei hun, ond nid ydynt yn ail-greu’r hyn sydd yn y stori; yn wir maent yn stori ynddynt eu hunain, bron. Mae’n drueni efallai fod y teip sy’n cyd-fynd â’r lluniau hyfryd o’r planhigion yn un sydd, o bosibl, yn anodd i ddarllenwyr ifanc ei ddarllen yn annibynnol, gan y gellid wedi defnyddio’r dudalen fel rhyw fath o gyfeirlyfr blodau ganddynt.



Mae pob plentyn ac oedolyn yn siŵr o ddotio ar y llyfr bendigedig hwn. ~Angharad Williams @ www.gwales.com