Cyfres Yma: Hadau

Mae Hadau wedi ei gosod yn y dyfodol ar ol i fom niwcliar ddinistrio gorllewin Ewrop. Roedd Cymry wedi sefydlu cymuned mewn ynys ger Norwy a Cai a Gwawr wedi eu magu yno. Maen nhw erbyn hyn wedi cyrraedd tref Aberystwyth yn yr henwlad (Cymru) ac yn dod o hyd i lwyth cyntefig sydd yn prysur rhedeg mas o fwyd a hadau i dyfu cnydau. ~Publisher: Y Lolfa

Os cawsoch chi flas ar Yr Ynys gan Lleucu Roberts, yna byddwch chi’n sicr o fwynhau Hadau – achos yr hyn a geir yma yw’r ail yn y drioleg ‘Yma’. Wedi dweud hynny, mae Hadau yn sefyll fel nofel ar ei phen ei hun hefyd, ac nid oes rhaid darllen y gyntaf yn y drioleg i allu deall y cefndir na’r digwyddiadau na gwybod am hanes y cymeriadau – dyma un o gampau’r awdures.



Megis yn Yr Ynys, yr hyn a geir yma yw hanes criw o bobl sy’n ddisgynyddion i Gymry yn dychwelyd i Aberystwyth yn y flwyddyn 2140. Mae hyn yn dilyn cyfnod maith o fyw ymhell o’r wlad a’i newidiadau di-rif. Cawn glywed am eu hantur, ac yn benodol am eu profiadau o ddod ar draws brodorion Aberystwyth 2140. Mae’r llwyth hwnnw wedi esblygu’n fodau dynol tra gwahanol i’r criw o’r ynys, gan addoli llygod mawr, yn un peth! Mae eu hiaith yn gymysgedd plentynnaidd o Gymraeg a Saesneg, a rhaid i’r criw wynebu’r gwahaniaethau hyn, gan gynnwys yr her o gyfathrebu’n llwyddiannus.



Un o gryfderau’r gyfrol yw’r clyfrwch syml a geir yn y deialogau wrth i ni ddysgu mwy am y brodorion, eu harferion a’u hiaith. Mae’r creadigrwydd hwn yn arwain at hiwmor yn aml iawn, boed yn hiwmor hollol amlwg, neu’n gynnil a chlyfar. Llwydda’r awdur hefyd i gadw’r ddysgl yn wastad wrth gyflwyno sefyllfaoedd sy’n ymddangos yn hurt bost ar adegau, ond ar yr un pryd yn cyffwrdd â realiti sy’n gyfarwydd i’r darllenydd. Mae hyn yn dipyn o gamp wrth archwilio a chyflwyno byd newydd i ddarllenydd.



Heb os, mae Lleucu Roberts yn berchen ar ddawn dweud arbennig. Mae’r iaith yn goeth a’r ysgrifennu’n grefftus. Pleser yw darllen nofel ag arddull gyhyrog nad yw’n tarfu ar lif y darllen. Rhaid aros yn amyneddgar am ymddangosiad y drydedd yn y drioleg nawr! ~Awen Schiavone @ www.gwales.com