Stori Sydyn: Y Stelciwr

Gweledigaeth fawr y byd llyfrau Cymraeg yw’r gyfres Stori Sydyn, a'i nod yn syml yw sichrau bod modd darllen y cynnwys mewn byr amser ac annog y darllenydd i ddarllen ymhellach.



Bûm braidd yn hir cyn dechrau agor cloriau'r gyfrol hon gan Manon Steffan Ros, ond wedi i mi ddechrau ar y darllen allwn i ddim mo’i gollwng.



Nid wyf am ddatgelu'r stori yn ormodol, ond fel mae’r teitl yn ei awgrymu, stori'r stelciwr sydd yma ac fel y mae e’n gweld y byd. Mae’r cyfan yn sinistr a brawychus ac fe ellir gweld sut y mae gweinion ein cymdeithas yn medru cael eu hudo. Ar adegau, mae rhywun yn cydymdeimlo â’r stelciwr wrth i un celwydd arwain at y nesaf, a’r cyfan yn troi’n un bywyd o fyw celwydd.



Tristwch hefyd yw gwybod bod cymeriadau fel Einir yn ein cymdeithas, a gellir gweld sut y mae hi’n cael ei sugno i mewn i’r cyfan, a hynny er mwyn gwireddu disgwyliadau cymdeithas.



Yr hyn sy’n bwysig mewn cyfrolau fel hyn yw stori gref sy’n cymell y darllen. Yn wir, mae’r stori hon gan Manon Steffan Ross fel ryw ffilm ond eto mae'n gwbl gredadwy.



Os oes gennych chi awr i'w sbario ac angen rhywbeth difyr i’w ddarllen dyma’r gyfrol i chi. Mae hi hefyd yn gwbl addas i’r sawl nad yw'n gyfarwydd â darllen llyfrau Cymraeg, gan fod y pwyslais ar y stori yn hytrach na’r arddull. Cofiwch mai £1 yw pris y gyfrol – bargen go iawn! ~Sarah Down-Roberts @ www.gwales.com